By 
This post is also available in: English (Angle) Español ( Panyòl)
Premye kote yo te pibliye atik sa a se nan Outlier Media.
Anviwon 86% elèv twazyèm ane nan Detroit pa li onivo klas yo, e anpil nan lekòl jadendanfan rive nan 12yèm ane nan Detroit klase pami lekòl ki bay rezilta ki pi ba yo nan Michigan.
Hope Starts Here ap chèche travay sou chif tankou sa yo lè yo konekte fanmi yo ak yon rezo resous ak pwogram pou ede ak devlopman jèn, gadri, ak sante tibebe ak sante matènèl. Yon òganizasyon k ap travay anba direksyon Hope Starts Here se Detroit Champions for HOPE.
Men sa Camarrah Morgan, ki fè pati komite direktè yo pou Detroit Champions for HOPE, te di: “Detroit Champions for HOPE ap eseye bay plis paran posib kapasite pou yo pran latèt nan aprantisaj ak devlòpman pwòp pitit yo”. “Nou asire nou paran yo konnen ki resous ki disponib pou yo ansanm ak mwayen pou sipòte devlòpman timoun lakay yo”.
Kellogg Foundation, Kresge Foundation, ak yon rezo òganizasyon benevòl te lanse pwojè Hope Starts Here la an 2016, pou abòde, yon fason konplè, pwoblèm ki gen nan sistèm edikasyon pou timoun ki pi jèn.
Apre yon pwosesis ki dire yon ane pou tande enkyetid 18,000 moun k ap viv Detroit, fondasyon yo te idantifye sis domèn ki se priyorite oswa “ki enpòtan anpil” pou entegre pwojè Hope Starts Here. Sis objektif fondamantal Hope Starts Here yo se ankouraje lasante, devlopman lajenès, ak byennèt; lidèchip paran ak fanmi; bay pwogram ak pwofesyonèl kalite wo nivo; devlope anviwònman ki an sekirite e ki bay enspirasyon; kreye pi bon sistèm òganizasyon; epi ogmante finansman pou edikasyon timoun ki pi jèn.
Tout sis priyorite sa yo te kreye apati enkyetid yo te tande paran yo te pataje an 2016. Morgan te pran latèt nan efò angajman kominote a.
Morgan di: “Paran yo te di nou pa gen okenn moun ki mande nou ki pwoblèm nou genyen nan katye nou an”. “Yo te vle gadri nan katye a ki an sekirite pou yo mache… Yo te vle santi yo respekte yo epi envite yo nan espas edikasyon yo, e premye bagay yo te di se te bon jan lokal ki bon kalite ak yon anviwònman pwòp, ki gen tout materyèl pitit yo bezwen, ak pwofesè ki atansyone”.
“Nou konnen sistèm edikasyon pou timoun ki pi jèn nan tèt anba”, se sa Eileen Storer Smith di, li menm ki se yon ofisye pwogram Hope Starts Here nan W. K. Kellogg Foundation. “Nou konnen tou domèn nan pa peye ase e òganizasyon kominotè fi ap dirije yo manke yon pakèt resous… Nou vle asire nou jèn timoun Detroit yo gen menm opsyon ak opòtinite ak timoun nan vil rezidansyèl yo”.
Sistèm Sante Henry Ford ak Depatman Sante Vil Detroit la met ansanm pou dirije premye priyorite a, ki vle fè sèvis sante ak sosyal yo vin pi aksesib.
“Objektif yo se amelyore sante manman ak tibebe yo. Y ap kreye yon sistèm kote chak manman vin gen resous tankou èd konsiltasyon doktè, daypè nan antouraj li… kèlkeswa sa li bezwen”, se sa Jonathan Hui, k ap travay pou Kresge Foundation, te di. “Y ap asire yo manman an gen aksè, pa sèlman ak sante, men tou sèvis devlòpman”.
Ni Henry Ford Sistèm Sante, ni Depatman Sante vil la swete elimine obstak nan fason bagay yo òganize ak enjistis nan domèn ras lè yo konsantre sou manman nwa ki ansent yo, moun k ap akouche yo, ak timoun ki gen ant 0 ak 8 an yo.
Pou dezyèm enperatif la, ki pale de lidèchip paran ak fanmi, gwoup tankou Detroit Champions for HOPE ap travay pou bay moun k ap pran swen timoun yo ak paran timoun piti yo teknik pou sipòte timoun yo epi prepare yo pou jadendanfan. Youn nan objektif Detroit Champions for HOPE se pou Detroit gen yon nivo kapasite 75% nan matematik ak Anglè pou twazyèm ane apati 2027.
Anplis de amelyorasyon onivo matematik ak literati, òganizasyon tankou Detroit Champions for HOPE ap travay tou pou asire yo, timoun yo jwenn ankadreman nan domèn mantal ak emosyonèl.
“Wòl dezyèm priyorite a konsantre sou paran yo kòm premye pwofesè pitit yo, men tou kòm defansè timoun yo”, se sa Morgan te di. “Detroit Champions for HOPE ap eseye aktive pouvwa anndan tout paran posib pou yo vin lidè aprantisaj ak devlopman pwòp pitit yo. Nou asire nou paran yo konnen ki resous ki disponib pou yo ansanm ak fason pou sipòte devlòpman timoun lakay yo.
Youn nan teknik Detroit Champions for HOPE kreye pou paran yo rele “6-A-Days”, ki se bay akolad, ankouraje, pale, chante, li ak jwe ak timoun yo chak jou.
Men sa Morgan esplike: “Youn nan eleman ki pi enpòtan pou devlòpman sèvo yon timoun se fason moun k ap bay swen yo kominike avèk yo”. “Te gen rechèch ki fèt sou timoun ki nan povrete ekstrèm yo ki montre kontak po a po te ede diminye enpak negatif povrete a genyen sou sèvo a. Li pi enpòtan toujou lè yo se yon tibebe ki fenk fèt. Akolad diminye nivo estrès kay timoun yo ak granmoun yo”.
Pou asire yo fanmi yo gen aksè ak bon jan kalite pwogram pou timoun ki pi jèn nan kad priyorite twa a, Early Childhood Investment Corporation ki pi Jèn ak Black Family Development ap batay pou edikatè yo gen yon pi bon salè. Epi, òganizasyon yo swete enfliyanse règleman eta ak federal yo pou pwofesyonèl edikasyon timoun ki pi jèn, yon fason pou bay yo aksè ak opòtinite devlòpman pwofesyonèl. Sa ap fè l pi fasil pou lekòl Detroit yo atire epi kenbe pi bon pwofesè.
Katriyèm priyorite Hope Starts Here se ogmante resous piblik yo pou amelyore kreyasyon, sekirite ak anviwònman aprantisaj nan sant kote yo pran swen timoun piti. Men sa a eta a te anonse nan mwa me: “Lajan pou Amelyorasyon Etablisman (Future Facilities Improvement Fund, FIF) Caring for MI Future ki sot nan Caring for MI, ki se 59 milyon dola, te ede plis pase 1,100 etablisman ki nan kay ak nan sant pou yo finanse plis pase 3,500 pwojè renovasyon ak amelyorasyon, elaji aksè ak sekirite, bon jan kalite, ak gadri abòdab pou moun Michigan”.
IFF, ki se yon ajans ki bay asistans teknik, fasilite pwojè pou amelyore oswa konstwi espas aprantisaj timoun ki pi jèn te sipòte plis pase 80 founisè nan Detroit ak 6.4 milyon dola pou amelyore lokal yo grasa sibvansyon an.
Apresa, United Way of Southeast Michigan ap travay pou entegre done nan tout sistèm edikasyon timoun ki pi jèn pou fanmi Detroit yo ka jwenn resous yo bezwen pi fasil.
“Y ap travay sou yon bagay ki rele yon Echanj Enfòmasyon Kominotè, ki pèmèt yo kreye yon kote fanmi yo ka jwenn tout bagay pou yo fè enskripsyon pou edikasyon timoun piti, [jwenn] manje, lojman, [ak] tout sa fanmi ki gen timoun piti yo ka bezwen, nan yon sans ki entegre nan yon sèl platfòm”, se sa Hui te di.
Travay yo gen ladan tou idantifye zòn kote bidjè leta a ka distribye pou pi byen sipòte fanmi Detroit yo.
Dènye priyorite Hope Starts Here se ogmante finansman pou edikasyon timoun ki pi jèn lè yo asosye finansman prive ak piblik ak bezwen fanmi Detroit yo. Southeast Michigan Early Childhood Funders Collaborative ap travay pou konble mankman ki genyen nan enfòmasyon sa yo.
Gwoup san benevòl k ap travay anba sipèvizyon Hope Starts Here yo te deja ap travay pou yon pi bon sistèm edikasyon timoun ki pi jèn nan Detroit. Pwojè sa a se yon fason pou fè travay yo pi byen parèt.
Menm pandan pandemi COVID-19 la, Hope Starts Here t ap travay pou ogmante aksè ekitab pami lekòl Detroit yo ak gadri yo. Kèk nan efò yo te fè yo enkli pote 23 milyon dola nan finansman sibvansyon estabilizasyon anfans pou kenbe founisè gadri yo nan biznis pandan pandemi an epi ede plis pase 1,000 fanmi Detroit resevwa Kredi Taks pou Timoun, ki te bay yon 6.5 milyon dola anplis pou fanmi ki gen revni fèb ak modere yo.
Òganizasyon ki fè patenarya ak Hope Starts Here yo te pote tou plis pase $5 milyon kòm finansman piblik ak prive pou ede louvri ak renove plis pase 120 klas ak espas aprantisaj nan Detroit. Sa gen ladan l $2.9 milyon ki soti nan pwogram Michigan Caring for MI Future lan.
Travay Hope Starts Here se bay ekip endepandan yo kapasite pou yo travay ak reyalize chak nan sis objektif yo. Ekip estrateji sa yo gen ladan paran ak manm kominote yo k ap travay ak òganizasyon benevòl k ap dirije priyorite sa a. Genyen tou yon komite konsèy ki gen ladan dirijan nan kominote yo, dirijan eta yo, pwofesè yo, ak lòt defansè yo. Komite a gen Direktè Pwogram Michigan yo k ap travay pou W.K. Fondasyon Kellogg, Yazeed Moore, ak Direktè Anchèf Pwogram Detroit la k ap travay pou Kresge Foundation, ki se Wendy Lewis Jackson k ap dirije l.
“[Se] sitou òganizasyon benevòl ki nan Detroit k ap dirije travay la. Men sa Storer Smith di: “Ranfòse lidèchip nan kominote a se fason w ap wè chanjman alontèm”. “Olye de yon gwo fondasyon, moun k ap dirije priyorite yo se moun ki rasanble patnè sa yo ansanm epi fè travay la fè yon sèl. Nou gen yon modèl enpak kolektif ak lidèchip distribye. Se yon kad kote pa gen moun ki gen plis otorite pase lòt la pou opinyon tout moun ka pase”.
Pou w aprann plis sou Hope Starts Here, ale sou hopestartsheredetroit.org/.
Sis “priyorite” oswa objektif Hope Starts Here , ak òganizasyon k ap bay resous yo byen define:
1ye Objektif: Fanmi ki an sante, ki pwospere. Òganizasyon ki alatèt yo: Henry Ford Sistèm Sante ak Depatman Sante Vil Detroit
2yèm Objektif: Bay paran timoun piti yo konpetans pou pi byen sipòte timoun yo. Òganizasyon ki alatèt: Champions for HOPE nan Detroit
3yèm Objektif: Atire epi kenbe pi bon kalite pwofesyonèl edikasyon preskolè pi kalifye. Òganizasyon ki responsab yo: Early Childhood Investment Corporation ak Black Family Development
4yèm Objektif: Bay timoun yo anviwònman ki an sekirite epi ki bay enspirasyon. Òganizasyon ki alatèt: IFF Community Development Financial Institution
5yèm Objektif: Pi bon aranjman sistèm. Òganizasyon ki alatèt: United Way of Southeast Michigan
6yèm Objektif: Pi bon finansman. Òganizasyon ki alatèt: Southeast Michigan Early Childhood Funders Collaborative
Comments